ShQO-da túrmege telefondy «Rollton» kespesine jasyryp ótkizbek bolǵan
ÓSKEMEN. QazAqparat – Shyǵys Qazaqstan oblysynda «Tekserý» aldyn alý is-sharasyn ótkizý barysynda túrmege tyıym salynǵan zattardy ótkizýdiń 5 faktisi anyqtaldy, dep habarlaıdy QazAqparat.
Qylmystyq-atqarý júıesi departamentinen málim etkendeı, 40 jastaǵy azamat OV 156/20 erekshe rejımdegi túzeý mekemesine «Asu» sý bótelkesine alkogol quıyp alyp ótpek bolǵan.
«Kelýshiniń jeke zattaryn tekserý kezinde OV 156/20 mekemesiniń qyzmetkerleri 1 lıtr kólemindegi bótelkeni tapty. Mıneraldy sýdyń bótelkesine alkogol quıyp alǵan azamat onyń aýyzsý ekenine sendirmek boldy. Alaıda, bótelkeden alkogoldiń erekshe ıisi shyqqan. Suıyqtyqtyń quramyn anyqtaý úshin tárkilengen zat saraptamaǵa jiberildi», - dedi vedomstvodan.
Taǵy bir fakti ShQO boıynsha QAJ departamentiniń OV-156/1 tergeý ızolıatorynda boldy. «Qazposhta» AQ fılıaly arqyly qamaýdaǵyǵa jiberilgen sálemdeme ishinen tosaptyń ydysyna salynǵan esirtki tabyldy. Mekeme qyzmetkerleri aıyptalýshynyń kózinshe 0,5 lıtr plastık ydystaǵy tosaptan erekshe ıisi bar ósimdik tektes jasyl tústi zatty alyp shyqty. Ol saraptamaǵa jiberildi.
Sonymen qatar, osy mekeme aınalasyndaǵy 50 metrlik tyıym salynǵan aýmaqta kúdikti azamat ustaldy. Mekeme qyzmetkerleri odan 2 uıaly telefon taýyp, tárkilendi. Azamattyń aıtýynsha, ol telefondardy sottalǵandar úshin qorshaýdan laqtyrmaq bolǵan.
Budan bólek, ShQO boıynsha OV 156/15 qatań tártiptegi mekemesinde jazasyn ótep jatqan azamatqa sálemdeme kelgen. Tekserý barysynda «Rollton» tez daıyndalatyn kespesiniń ishinen «SAMSUNG» markaly uıaly telefon tabyldy.
Osyndaı derek ShQO boıynsha QAJD OV 156/18 mekemesinde boldy. Onda uıaly telefon «Safarı» markaly shaıdyń qorabyna jasyrylǵan.
Atalǵan derekter boıynsha QR ÁQBtK-niń 481-babynyń 1-bóligine sáıkes barlyq tulǵalardy ákimshilik jaýapkershilikke tartý úshin materıaldar jınaldy.
Málim etilgendeı, s ottalǵandarmen kezdesýge kelgen azamattar mekemege tyıym salynǵan zattardy alyp ótý áreketteri úshin jaýapkershilik týraly aldyn ala eskertiledi.
