ShQO-da túrmeden qashyp ketken er adam basqa óńirde ustaldy
ÓSKEMEN. KAZINFORM — Shyǵys Qazaqstan oblysynda túrmeden qashyp ketken sottalǵan azamat basqa óńirde qolǵa tústi.
ShQO boıynsha Qylmystyq-atqarý júıesi departamentiniń málimetine súıensek, alaıaqtyq jasaǵany úshin jazasyn ótep júrgen er adam túzetý mekemesi aýmaǵynan tys jerde jumys isteý múmkindigin paıdalanyp, tańerteń jumysqa ketkennen keıin qaıtyp oralmaǵan.
Sottalǵan azamattyń № 24 eń tómengi qaýipsizdik mekemesinen qashqany anyqtalǵan sátten bastap QAJ departamentiniń qyzmetkerleri izdestirý is-sharalaryn uıymdastyryp, bes saǵat ishinde er adamnyń qalaı qaraı ketkenin anyqtady. Olar Jetisý oblysy Polıtsııa departamentiniń Uıymdasqan qylmysqa qarsy kúres basqarmasymen birlesip, sottalǵan azamatty basqa óńirde ustady.
— Qyzmetkerlerdiń úılesimdi ári jedel áreketiniń arqasynda qozǵalys baǵyty anyqtalyp, sottalǵan azamat ustaldy. Qazirgi ýaqytta jazasyn óteýden jaltarý deregi boıynsha tıisti is-sharalar júrgizilip jatyr, — deıdi departamenttiń resmı ókili Saltanat Ojıkanova.
Eske salsaq, osyǵan deıin Pavlodar túrmesinde shaı arasyna jasyrylǵan uıaly telefon tabylǵany habarlanǵan.
