ShQO-da túrmede jazasyn ótep jatqan sheteldik alǵash ret Naýryz kóje dámin tatty
ÓSKEMEN. QazAqparat – Shyǵys Qazaqstan oblysynda túrmede jazasyn ótep jatqan sheteldik alǵash ret Naýryz kóje dámin tatty, dep habarlaıdy QazAqparat tilshisi.
ShQO boıynsha QAJ departamenti baspasóz qyzmetiniń málimetine súıensek, OV156/6 mekemesinde Naýryz meıramy atap ótildi. Sottalǵandar arasynda ulttyq oıyndar uıymdastyrylyp, dastarhan jaıyldy.
«Búginde túzetý mekemesinde jazasyn ótep jatqandar arasynda polıak, orys, belorýs jáne ýkraın ulttary bar. Solardyń biri – polıak Denıs Kamınskıı. Ol aýyr qylmys jasaǵany úshin 8 jylǵa sottalǵan», - delingen aqparatta.
Denıstyń aıtýynsha, Naýryz meıramyn temir tordyń ar jaǵynda ótkizedi dep esh oılamaǵan. Alǵash ret Naýryz kóje men qurttyń dámin tatyp kórgen ol qatty unaǵandyǵyn jetkizdi.
«Buryn-sońdy mundaı keremet taǵamdardy jep kórmeppin. Dámi til úıiredi eken. Jentti de jeı bergiń keledi», - dedi ol.
Sottalǵandardyń barlyǵyna ulttyq taǵamdardyń jasalý joldary men ádisteri aıtyldy.
«Mundaǵy maqsatymyz – qazaq mádenıeti men ulttyq taǵamdardyń baılyǵyn kórsetý boldy. Ulttyq mázirden túrli etnos ókilderi dám tatyp, óz oılarymen bólisti», - dedi mekeme bastyǵy Qýanysh Aǵysbaev.
