ShQO-da túrme qyzmetkerleri otyrǵan kólik aýdarylyp, 1 adam qaza boldy
ÓSKEMEN. QazAqparat – Shyǵys Qazaqstan oblysy Shemonaıha aýdanynda túrme qyzmetkerleri otyrǵan kólik aýdarylyp, 1 adam kóz jumdy, dep habarlaıdy QazAqparat tilshisi.
ShQO boıynsha QAJ departamenti baspasóz qyzmetiniń málimetine súıensek, Shemonaıha aýdanynyń ortalyǵyndaǵy Vokzalnaıa kóshesinde ornalasqan janarmaı quıý beketiniń mańynda Toyota avtokóligi jyraǵa qulap, aýdarylyp qalǵan. Onyń ishinde Polovınka aýylyndaǵy OV 156/6 mekemesiniń tórt qyzmetkeri bolǵan.
«Mekeme qyzmetkerleri jumystan tys ýaqytta jol apatyna ushyrady. Júrgizýshi rýlge ıe bola almaı qalǵan. Sonyń saldarynan artqy oryndyqtaǵy 31 jastaǵy jolaýshy qaza boldy. Jaraqat alǵan úsh adam Shemonaıha ortalyq aýdandyq aýrýhanasyna jetkizildi», - delingen aqparatta.
Atalǵan fakti boıynsha qyzmettik tergeý júrip jatyr. Departament basshylyǵy men ujymy, Qylmystyq-atqarý júıesi ardagerler keńesi marqumnyń otbasynyń qaıǵylaryna ortaqtasyp, kóńil aıtty.
Esterińizge sala ketsek, osyǵan deıin ShQO-da synyptasy kózine qalam tyǵyp alǵan oqýshyǵa Reseıde ota jasalatyndyǵyn habarlaǵan edik.
