ShQO-da túrme qyzmetkerleri 30 otbasyna kómek kórsetti
ÓSKEMEN. QazAqparat – Shyǵys Qazaqstan oblysyndaǵy túrme qyzmetkerleri Táýelsizdik kúnine oraı 30 otbasyna kómek kórsetti, dep habarlaıdy QazAqparat tilshisi.
ShQO boıynsha qylmystyq atqarý júıesi departamenti baspasóz qyzmetiniń málimetine súıensek, el Táýelsizdiginiń 30 jyldyǵyna oraı jaǵdaıy tómen otbasylarǵa qolushyn sozýǵa arnalǵan aktsııa uıymdastyryldy.
«Qylmystyq-atqarý júıesiniń qyzmetkerleri az qamtylǵan jáne kópbalaly 30-dan astam otbasyǵa kómektesti. Árbir januıa azyq-túlikpen, jeke gıgıenalyq zattarmen, kıim-keshekpen qamtamasyz etilip, balalarǵa táttiler men oıynshyqtar tabystaldy», - delingen aqparatta.
Táýelsizdik kúnine oraı uıymdastyrylǵan aktsııa aldaǵy ýaqytta da jalǵasyn tappaq.
