ShQO-da túrme aýmaǵyna telefon laqtyrmaq bolǵan er adam ustaldy
ÓSKEMEN. QazAqparat – Shyǵys Qazaqstan oblysynda túzetý mekemesiniń aýmaǵyna uıaly telefondar men sım-kartalardyń partııasyn laqtyrmaq bolǵan er adam ustaldy, dep habarlaıdy QazAqparat tilshisi.
ShQO boıynsha qylmystyq atqarý júıesi departamentiniń baspasóz qyzmetiniń málimetine súıensek, 156/2 túzetý mekemesiniń qyzmetkerleri tyıym salynǵan zattardy kirgizý áreketiniń aldyn aldy.
Óskemen qalasynyń turǵyny kolonııa qorshaýynan taspaǵa oralǵan qorapty laqtyrmaq bolǵan.
Zańsyz áreketti mekeme qyzmetkerleri baıqap qaldy. Er adam mekeme mańynan ustaldy.
Óz sózinde ol qorshaý boıymen keshki serýenge shyqqanyn alǵa tartqan.
«Tekserý kezinde qoraptan eki smartfon men sım-kartalar tabylyp, tárkilendi. Er adam tyıym salynǵan zattardy sottalǵan tanysyna laqtyrmaq bolǵanyn moıyndady. 23 jastaǵy azamat QR ÁQBtK-niń 481-baby (qylmystyq atqarý júıesi mekemelerinde ustalatyn adamdarǵa tyıym salynǵan zattardy berý) boıynsha ákimshilik jaýapqa tartyldy», - dedi OV 156/2 mekemesiniń basshysy Erkin Kabın.
