ShQO-da túrme aýmaǵyna 3 uıaly telefon laqtyrǵan er adam jaýapqa tartyldy
ÓSKEMEN. QazAqparat – Shyǵys Qazaqstan oblysynda túrme aýmaǵyna 3 uıaly telefon laqtyrǵan er adam ustaldy, dep habarlaıdy QazAqparat tilshisi.
ShQO boıynsha QAJD baspasóz qyzmetiniń málimetine súıensek, oqıǵa OV 156/3 túzetý mekemesinde bolǵan. Er adam tyıym salynǵan zattardy qorshaýdan laqtyryp qasha jónelgen. Kolonııa qyzmetkerleri 41 jastaǵy azamatty qýyp jetip, ustap aldy. Odan skotchpen oralǵan zattar tárkilendi.
«Er adam úsh smartfondy túrme aýmaǵyna kirgizbek boldy. Kúdikti kolonııanyń jedel bólimine jetkizildi. Oǵan qatysty QR ÁQBtK-niń 481-baby (Qylmystyq-atqarý júıesi mekemelerinde jazasyn ótep jatqan sottalǵandarǵa tyıym salynǵan zattar men buıymdar berý) boıynsha ákimshilik hattama toltyryldy», - delingen aqparatta.
Túzetý mekemesiniń qyzmetkerleri isti sotqa jiberdi. Sondaı-aq sol «sálemdemeniń» kimge tıesili ekendigi anyqtaldy. Túrmede jazasyn ótep jatqan 31 jastaǵy sottalǵan adam da jaýapkershilikke tartylmaq.
