ShQO-da týrızm salasyna 500 mln teńge zańǵa qaıshy bólingeni anyqtaldy
ÓSKEMEN. KAZINFORM - Shyǵys Qazaqstan oblysynda týrızm salasynda bıýdjet qarajatyn tıimsiz paıdalaný faktileri tirkelip otyr.
Bul týraly Sybaılas jemqorlyqqa qarsy is-qımyl agenttigi ShQO boıynsha departamentiniń basshysy Denıs Shakenov málim etti.
- Óńirde týrızm salasyn sýbsıdııalaý salasyna syrtqy taldaý aıaqtaldy. Tekseris barysynda 2022 jyldyń qańtaryna deıin paıdalanýǵa berilgen nysandar boıynsha shyǵyndardy negizsiz óteý faktileri anyqtaldy. Kásipkerler birneshe jyl buryn salynyp qoıǵan týrıstik nysandarǵa sýbsıdııa alǵan. Bul mundaı tólemderdiń durystyǵyna úlken kúmán týdyrady, - deıdi ol.
Sýbsıdııa alý úshin usynylǵan derekterdiń durystyǵyn tekserý tártibinde de olqylyqtar anyqtalǵan.
- Sonyń saldarynan bıýdjet qarajatyn negizsiz jumsaý táýekelderi týyndap, memlekettik qoldaýdyń tıimdiligi tómendeıdi, - deıdi Denıs Shakenov.
Quqyq buzýshylyqtardy joıý jáne laýazymdy tulǵalardyń jaýapkershiligin qaraý úshin materıaldar ýákiletti organdarǵa joldandy.
Eske salsaq, osyǵan deıin ShQO-da 21 adamdy aldap, 101 mln teńge paıda kórgen alaıaq sottalǵany habarlanǵan.