ShQO-da týrızm basqarmasyna jańa basshy taǵaıyndaldy

ÓSKEMEN. KAZINFORM – Shyǵys Qazaqstan oblysynyń týrızm basqarmasyn Erjan Sembınov basqaratyn boldy, dep habarlaıdy Kazinform agenttiginiń tilshisi.

Tıisti sheshim oblys ákimdiginiń otyrysynda QR Memlekettik qyzmet isteri agenttiginiń kelisimimen qabyldandy.

Aımaqty jáne memlekettik basqarý qurylymyn jaqsy biletin mamannyń taǵaıyndalýy oblysta týrızm salasyn belsendi damytý mindetimen sáıkes keledi. Shyǵys Qazaqstan – el ishindegi jáne shetelden keletin týrızmniń basty baǵyttarynyń biri. Munda ınfraqurylymdy jańǵyrtý men ınvestıtsııa tartý basty nazarda tur.

Erjan Sembınov – Ulan aýdany Gornıak aýylynan shyqqan. Ortalyq Azııa ýnıversıtetiniń túlegi, ekonomıka mamandyǵy jáne quqyqtaný bakalavry biliktiligine ıe. Eńbek jolynda ortalyq memlekettik organdardaǵy qyzmetterden bastap, jergilikti atqarýshy bıliktegi basshylyq laýazymdarǵa deıin túrli qyzmetter atqarǵan.

Buǵan deıin ol ShQO boıynsha Memlekettik kirister mınıstrligine qarasty «Keden transservıs» RMK dırektory, Rıdder qalasy ákiminiń apparatyna jetekshilik etken, sondaı-aq oblys ákiminiń apparatynyń syrtqy baılanystar jáne hattama bóliminde, týrızm, dene shynyqtyrý jáne sport, ishki saıasat basqarmalarynda eńbek etken.

Eske sala keteıik, buǵan deıin Atyraý oblysynyń jumyldyrý daıyndyǵy basqarmasynda basshy aýysqan edi.