ShQO-da týrıstik aımaqtarǵa aparatyn joldar jóndeledi
ÓSKEMEN. QazAqparat – Shyǵys Qazaqstan oblysynda týrıstik aımaqtarǵa aparatyn joldar jóndeledi, dep habarlaıdy QazAqparat tilshisi.
ShQO ákimi Danıal Ahmetov qala jáne aýdan ákimderimen, basqarma basshylarymen jınalys ótkizdi. Sonyń barysynda birqatar mańyzdy másele talqylandy. Onyń biri – jolaýshy tasymaly.
Aımaq basshysynyń aıtýynsha, áleýmettik mańyzy bar baǵyttarda qatynaıtyn tasymaldaýshylarǵa turaqty negizde sýbsıdııa bólinedi.
«Óskemen-Zaısan» áýe baǵytyn damytý úshin Zaısan aýdanynyń ákimdigine jergilikti áýejaıdyń ushyp-qoný jolaǵyn jóndeýge jobalyq-smetalyq qujattama daıyndaýdy tapsyrdym.
Joldardy jóndeýge qatysty aıtar bolsaq, Rıdder qalasy men Altaı aýdanynyń týrıstik aımaqtaryna aparatyn joldardy jóndeý jáne salý jalǵasady», - dedi ol.
Jıyn barysynda Danıal Ahmetov Altaı aýdany Jańa Buqtyrma kentiniń turǵyndary kótergen birneshe máselege nazar aýdardy.
«Atalǵan kentte aýrýhanany jóndeýge jobalyq-smetalyq qujattama daıyn. Sondaı-aq onda qazaq tilinde oqytatyn mektep salý qajet. Bilim ordasynyń úlgilik jobasy da ázir. Osy týraly ótinishpen maǵan aýyl turǵyndary birneshe ret júgingen edi», - dedi Danıal Ahmetov.
Budan bólek, jınalysta bordaqylaý alańdarynyń tıimdiligi jáne saýda úshin balyq ósirýdi sýbsıdııalaý máselelerine nazar aýdaryldy.
