ShQO-da turǵyndar narazylyǵyn týǵyzǵan shoshqa fermasyna qatysty sot úkimi shyqty

ÓSKEMEN. QazAqparat – Shyǵys Qazaqstan oblysy Óskemen qalasy men Glýbokoe aýdany Stepnoe, Shmelev Log aýyldary halqynyń narazylyǵyn týǵyzǵan shoshqa fermasyna qatysty sot úkimi shyqty, dep habarlaıdy QazAqparat tilshisi.

ShQO Ekologııa departamenti baspasóz qyzmetiniń málimetine súıensek, turǵyndardyń shaǵymynan soń shoshqa fermasyna tekserý júrgizilgen. Sonyń nátıjesinde, birqatar zańbuzýshylyq anyqtaldy.

«Atap aıtqanda, «Rodnıchok» sharýa qojalyǵyna tıesili shoshqa fermasy Shmelev Log jáne Leshoz aýyldarynda jumys isteýge qajetti ekologııalyq ruqsat qaǵazdaryn rásimdemegen. Shoshqa qaldyqtary ashyq jerge tastalýy saldarynan topyraq jamylǵysy lastandy. Soǵan oraı departament ferma ıesine aıyppul salyp, kemshilikterdi túzetýge ýaqyt berdi. Alaıda odan esh nátıje shyqqan joq», - delingen aqparatta.

Osydan soń is Óskemen qalalyq mamandandyrylǵan ákimshilik sotynda qaraldy. Sot shoshqa fermasyn jabý týraly sheshim shyǵardy. Úkim áli zańdy kúshine engen joq.

Eske salsaq, osyǵan deıin ShQO-da shoshqa fermasy tekserilgendigin habarlaǵan edik.