ShQO-da Turǵyn úı qurylys jınaq bankinde salymy bar 1000-nan astam otbasy baspanaly bolady
ASTANA. QazAqparat - Turǵyn úı qurylys jınaq bankiniń ShQO fılıaly dırektorynyń orynbasary Raýan Baıashtyń habarlaýynsha, aǵymdaǵy jyly turǵyn úı qurylys baǵdarlamalary aıasynda Shyǵys Qazaqstanda jekemenshik páterine 1 142 salymshy qol jetkize alady, dep habarlaıdy «QazAqparat» HAA tilshisi ShQO aqparattyq ortalyǵyna silteme jasap.
- «Nurly jol» ınfraqurylymdyq damytý baǵdarlamasy boıynsha 559 adam, al, turǵyn úı qurylysynyń «Jaıly turǵyn úı» óńirlik baǵdarlamasy boıynsha 450 salymshy, banktiń «Óz úıim» baǵdarlamasy boıynsha 133 óńir turǵynyna óz úıleriniń kilti tabystalatyn bolady, - deıdi Raýan Baıash .
Fılıal dırektorynyń aıtýynsha, «Nurly jol» baǵdarlamasynyń turǵyn úıge qoljetimdi baǵadan basqa basty ereksheligi - jyldyq 5 % kólemindegi nesıe boıynsha jeńildigi bar syıaqy mólsherlemesi bolyp tabylady (JTSM 5,6%). Biraq, turǵyn úı baǵasynyń 30% kólemindegi somasyn jınaqtaý nemese depozıtke salý sııaqty mindetti talaptar da bar. Memlekettik baǵdarlama talabyna kelmeıtin salymshylar úshin Shyǵys-Qazaqstan oblysynda turǵyn úı qurylysynyń «Jaıly turǵyn úı» óńirlik baǵdarlamasy áreket etedi. Onyń basty ereksheligi - salymshynyń jekemenshik turǵyn úıi bolýyna shekteý qoıylmaıdy.
- Turǵyn úı qurylys jınaq banki óńirlerde «Óz úıim» baǵdarlamasynyń jekemenshik baǵdarlamasyn da iske asyra bastady. Óz ýaqytynda ony turǵyn úı qurylysyn yntalandyrý úshin, turǵyn úıdi odan saıyn qoljetimdirek etýge, halyqtyń qalyń jiginiń turǵyn úı jaǵdaıyn jaqsartýǵa múmkindigin arttyrýǵa kómektesetin bank ázirlegen bolatyn. Baǵdarlamada, sondaı-aq, menshiginde úıdiń bolýy nemese bolmaýyna shekteý joq. Baǵdarlamanyń qosymsha ereksheligi turǵyn úı baǵasynyń 30%-y depozıtinde jınaqtalǵan kezde zaem alý múmkin bolyp tabylady, - dep túsindirdi oblystyq fılıal dırektorynyń orynbasary.
Qazirgi kezde «Óz úıim» baǵdarlamasy boıynsha 2018 jyly iske asyrý josparlanyp otyrǵan jobalar da bar. Ol boıynsha 876 páter bank salymshylarynyń arasynda arnaıy baǵa jáne kredıt berý talaptary boıynsha bólinedi. Sondaı-aq, Raýan Baıash Turǵyn úı baǵasynyń 50%-yn jınaqtaǵan nemese óz depozıtine engizgen banktiń salymshylary turǵyn úı baǵdarlamalaryna qatyspaı-aq orta naryqtaǵy turǵyn úı múligin satyp ala alatyndyǵyn aıtyp ótti.
