ShQO-da tún jarymynda jumys istegen meıramhana ıesine aıyppul salyndy
Reıd barysynda Óskemende 251 nysan qamtylyp, shekteý sharalaryn buzýdyń 5 faktisi tirkeldi.
Sonymen qatar «Strelets» dúkenindegi «Foto» saýda bólimi, «Amanat»,«Globýs»dúkenderinde, jáne «Adem» saýda úıinde buryn anyqtalǵan zańbuzýshylyqtar boıynsha aıyppul salyndy.
Al Semeıde tyıym salynǵan ýaqytta jumys istegeni úshin «Blackberry» dámhanasynyń ıesi 319 470 teńge mólsherinde aıyppul arqalady.
«Rıdder qalasynda 3 jeltoqsanda 5 reıd júrgizilip, 61 nysan qamtyldy. Demalys kúni jumys istegen azyq-túliktik emes «Ermak» dúkeniniń basshysy aıyppul tóleýge mindetteldi. Zaısan aýdanynda 51 nysan tekserilip, 3 hattama toltyryldy. Kókpekti aýdanynda maska rejımin saqtamaǵan M.Shakenov esimdi azamatqa aıyppul salyndy» delingen ShQO aqparat ortalyǵy taratqan málimette.
Shemonaıha aýdanynda monıtorıng toby azyq-túlik dúkenderin, dárihanalardy, aıaldamalar men kóshelerdi aralady.
Barlyǵy 70 nysan qamtylyp, 1 ereje buzý faktisi tirkeldi. Naqty aıtqanda, jumys ornynda maskasyz otyrǵan azamatqa 41 670 teńge kóleminde aıyppul salyndy.
Sonymen qatar Altaı aýdanyndaǵy Jańa Buqtyrma kentinde ornalasqan «Altaı», «№1» dúkenderinde, Altaı qalasyndaǵy «Beer fish» dúkeninde satýshylar qolǵapsyz qyzmet kórsetken, sonymen qatar «Pena» avtojýý mekemesiniń jumysshysy jeke qorǵanys zattaryn qoldanbaǵan.
Aıta keteıik, ShQO-da 128 monıtorıng toby jumys isteýde.
Onyń quramyna polıtsııa qyzmetkerleri, jergilikti atqarýshy organdardyń ókilderi, sanıtarııalyq-epıdemıologııalyq baqylaý departamentiniń mamandary kiredi.