ShQO-da tún ortasynda ata-anasynyń qaraýynsyz dalada júrgen 99 bala anyqtaldy
ÓSKEMEN. QazAqparat – Shyǵys Qazaqstan oblysynda ata-anasynyń qaraýynsyz túngi ýaqytta dalada júrgen 99 bala anyqtaldy, dep habarlaıdy QazAqparat tilshisi.
Óńir aýmaǵynda 17 maýsymnan bastap «Túngi qaladaǵy balalar» jedel aldyn alý sharasy júrgizilýde.
Mundaǵy maqsat – balalardyń quqyqtaryn buzý faktilerin anyqtaý, kámelet jasyna tolmaǵandardy eńbekke tartý, balalardyń qadaǵalaýsyz jáne panasyz qalýynyń aldyn alý.
«Sharanyń birinshi kúninde polıtsııa qyzmetkerleri men belsendi jastar 119 reıdke shyǵyp, 1 132 obektini tekserdi. Túngi ýaqytta ata-anasynyń qaraýynsyz syrtta júrgen 99 bala anyqtaldy. Sondaı-aq kámeletke tolmaǵandarǵa alkogol ónimin satqan (ÁQBtK-niń 200-baby) – 3, temeki saýdalaǵan (ÁQBtK-niń 133-baby) – 2 adam ákimshilik jaýapkershilikke tartylǵan», - dep habarlady ShQO Polıtsııa departamentiniń baspasóz qyzmeti.
Máselen, Óskemen qalasyndaǵy shaǵyn marketterdiń birinde saǵat 23.00-den keıin jalǵyz júrgen 16 jastaǵy jasóspirim anyqtaldy.
Atalǵan fakti boıynsha onyń anasyna ÁQBtK-niń 442-baby 2-tarmaǵyna sáıkes ákimshilik hattama toltyryldy.
Aıta keteıik, «Túngi qaladaǵy balalar» jedel aldyn alý sharasy 20 maýsymǵa deıin jalǵasady.
