ShQO-da tumaýmen aýyrǵandar sany 5 esege jýyq artqan
ÓSKEMEN. KAZINFORM – Shyǵys Qazaqstan oblysynda tumaýǵa qarsy ekpe saldyrý naýqany 15 qyrkúıekte bastalady.
Tumaý men jiti respıratorlyq vırýstyq ınfektsııanyń 2026-2027 jyldardaǵy epıdemıologııalyq maýsymy 1 qazanda bastalyp, 2027 jylǵy 1 mamyrǵa deıin jalǵasady.
- Ótken maýsymda oblysta JRVI-diń 216 982 jaǵdaıy tirkelgen. Onyń 129 948-i 14 jasqa deıingi balalardan anyqtaldy. Bul jalpy kórsetkishtiń 59,8%-yn quraıdy. Zerthanalyq jolmen tumaýdyń 182 jaǵdaıy rastaldy, onyń 93-i balalar arasynda tirkelgen. 2024-2025 jyldardaǵy sáıkes kezeńmen salystyrǵanda JRVI kórsetkishi 9%-ǵa, tumaý 4,6 ese ósken. Alaıda syrqattaný deńgeıi kópjyldyq baqylaý kórsetkishinen asqan joq, - dep habarlady ShQO epıdemıologııalyq baqylaý departamentinen.
Ótken epıdemıologııalyq maýsymda koronavırýs ınfektsııasynyń 2 jaǵdaıy anyqtalǵan. Al aldyńǵy maýsymda COVID-19-dyń 25 jaǵdaıy tirkelgen.
- Óńirde jergilikti bıýdjet qarajatyna tumaýǵa qarsy vaktsınanyń 75 myń dozasyn satyp alý kózdelgen. Ekpe naýqany 15 qyrkúıekte bastalyp, 1 qarashaǵa deıin jalǵasady. Vaktsına oblysqa 14 qyrkúıekke jetkiziledi dep josparlanǵan, - delingen aqparatta.
Ekpe aldymen júkti áıelderge, medıtsına qyzmetkerlerine, balalarǵa, sozylmaly aýrýlary bar jáne 60 jastan asqan turǵyndarǵa salynady. Qalǵan azamattar vaktsınany óz qarajatyna nemese jumys berýshi esebinen ala alady.
Eske salsaq, osyǵan deıin Almatyda JRVI men tumaý juqtyrý kórsetkishi 40 paıyzǵa tómendegeni habarlanǵan.
