ShQO-da tuqym sebý kesheniniń otandyq balamasy shyǵarylatyn bolady
ÓSKEMEN. QazAqparat - Oblys ortalyǵyndaǵy ÚMZ zaýytynyń bazasynda álemdik úlgidegi tuqym sebý tehnıkasy qurastyrylyp jatyr. Jańa keshen álemge áıgili tehnıkalardyń otandyq balamasy bolady dep kútilýde, dep habarlaıdy QazAqparat tilshisi.
«Biz aýyl sharýashylyǵyna arnalǵan mashına qurastyrý isin damytýǵa tıispiz. ÚMZ zaýytynyń bazasynda álemdik úlgidegi tuqym sebý keshenin qurastyryp jatyrmyz. Ol keshen sapasy jaǵynan amerıkalyq, almanııalyq balamalarymen básekelese alady. Qazirgi tańda jańa tehnıkanyń qujattaryn rettep jatyrmyz. Qajetti qaǵazdardyń 50 paıyzy daıyn», - deıdi Danıal Ahmetov.
Otandyq tehnıka John Deere, CLAAS, Horsch sııaqty álemdik brendterdiń eń ozyq degen qyrlaryn boıyna jınaqtaýy tıis. Mamandardyń dereginshe, óńirdegi tuqym sebý keshenderiniń 40 paıyzdan astamyn John Deere modeliniń ónimderi quraıdy. Otandyq tehnıka oblystyń qajettiligin tolyqtaı qamtamasyz etkennen keıin elimizdiń basqa da óńirlerine taratylmaq.
Sonymen qatar,oblysta maıly daqyl tuqymdaryn hımııalyq óńdeý tásili jolǵa qoıyla bastady. Búginde osy tásilmen óńdelip, egiletin úsh túrli kúnbaǵys gıbrıdi memlekettik synaqtan ótip jatyr. Onyń ekeýi bıylǵy egis naýqanynda egilmek. Endi osy tásilmen óńdeletin soıa, raps jáne zyǵyrdyń jańa suryptaryn alý josparlanyp otyr.
