ShQO-da tirkemesi bar kólikterge qoıylǵan qysqy shekteý alyndy

ASTANA. KAZINFORM – Shyǵys Qazaqstan oblysynda respýblıkalyq mańyzy bar «Óskemen – Altaı – Katonqaraǵaı – Rahman qaınary» avtojolynyń 46-66 shaqyrymyndaǵy (Severnoe aýyly – Serebrıansk qalasy aralyǵy) ýchaskesinde tirkemesi jáne jartylaı tirkemesi bar kólikterdiń qozǵalysyna qys mezgilinde engizilgen maýsymdyq shekteýler alyndy. Bul týraly QazAvtoJol habarlady.

Atalǵan shekteýler jyl saıyn kúrdeli jol ýchaskelerindegi jol-kólik oqıǵalarynyń aldyn alý maqsatynda engiziledi. Kóktaıǵaq, boran jáne kóriný deńgeıiniń tómendeýi jaǵdaıynda iri gabarıtti kólikterdiń qozǵalysy joǵary qaýip tóndiredi.

Bıylǵy maýsymda shekteý 2025 jylǵy qarasha aıynan bastap engizildi jáne turaqty jyly aýa raıynyń ornaýy men jol jaǵdaıynyń jaqsarýyna baılanysty 2026 jylǵy 1 sáýirde shekteý alynyp tastaldy. Osy kezeńde jol qyzmetteri táýlik boıy jumys istep, joldardy qardan tazalaý, kóktaıǵaqqa qarsy materıaldar sebý jáne avtokolonnalardy súıemeldeý jumystaryn júrgizdi.

– Qurmetti júrgizýshiler, kóktemgi aýa raıynyń qubylmaly bolýyna baılanysty, ásirese taýly aımaqtar men asýlarda qaýipsiz araqashyqtyq pen jol erejesin qatań saqtaýlaryńyzdy suraımyz, - delingen habarlamada.

Buǵan deıin búgin, 2 sáýirde eldegi qaı joldar ashyq, qaısysy jabyq ekenin jazǵan bolatynbyz.