ShQO-da tótenshe jaǵdaı rejimin buzǵan kásipkerler jazalandy
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri reıd barysynda tótenshe jaǵdaı rejimin buzǵan kásipkerlerdi anyqtady, dep habarlaıdy QazAqparat.
ShQO Polıtsııa departamenti baspasóz qyzmetiniń málimetine súıensek, Óskemen jáne Semeı qalasyndaǵy eki meıramhana jumys ýaqytyn shekteýge qatysty talapty oryndamaǵan. Tártip saqshylary kásip ıelerine qatysty ákimshilik is qozǵap, sotqa joldady.
«Naýryz meıramynda Óskemendegi karaoke klýby óz jumysyn 22:00-den keıin de jalǵastyra bergen. Onyń ıesine qatysty QR Ákimshilik quqyq buzýshylyq týraly kodeksiniń 476-baby (Tótenshe jaǵdaı rejimin buzý) boıynsha ákimshilik hattama toltyryldy. Sondaı-aq JShS aýmaǵyn dezınfektsııalamaǵan zańdy tulǵa jaýapqa tartylǵan», - dep habarlady vedomstvo ókilderi.
Jalpy oblys boıynsha búginde tótenshe jaǵdaı rejimin buzýdyń 7 faktisi tirkelgen.
