ShQO-da tótenshe jaǵdaı rejimin buzǵan kásipkerler qamaýǵa alyndy
ÓSKEMEN. QazAqparat – Shyǵys Qazaqstan oblysynda 10 kásipker tótenshe jaǵdaı rejimin buzǵan, dep habarlaıdy QazAqparat.
«Óskemen qalasyndaǵy karaoke klýbynyń ıesi tótenshe jaǵdaı kezindegi shekteýge qaramastan 22.00-den keıin jumysyn jalǵastyra bergen. QR Ákimshilik quqyq buzýshylyq týraly kodeksiniń 476-babyn buzǵan kásipker 15 táýlikke qamaýǵa alyndy», - dep habarlady ShQO Polıtsııa departamentiniń baspasóz qyzmeti.
Sonymen qatar Glýbokoe aýdanyndaǵy ınternet klýby da zańmen bekitilgen ýaqytta jabylmaǵan. 23 jastaǵy kásipker ákimshilik jaýapkershilikke tartylyp, 3 kúnge qamaldy.
«Búginde jalpy oblys boıynsha tótenshe jaǵdaı rejimin buzǵan 10 kásipker anyqtalǵan. Tártip saqshylary aldaǵy ýaqytta da tekserý jumystaryn jalǵastyrady. Osy rette, qandaı da bir zańbuzýshylyqty baıqaǵan turǵyndardan polıtsııaǵa habar berýlerin suraımyz», - delingen vedomstvo málimetinde.
