ShQO-da tórt jylda dala jáne orman órtinen keltirilgen zalal 3 mlrd teńgege jetken

Shyǵys Qazaqstan oblysynda sońǵy 4 jylda 500-ge jýyq ret orman órtendi, dep habarlaıdy Kazinform.   

Shyǵys Qazaqstannyń 2 mln gektarǵa jýyq aýmaǵyn orman alqaby alyp jatyr. Sońǵy 4 jylda óńir boıynsha 924 ret dala jáne 493 ret orman órti bolǵan. Sonyń saldarynan keltirilgen jalpy shyǵyn 3 mlrd teńgege jetti.

«Sońǵy 5 jylda orman sharýashylyǵynyń mekemelerine bıýdjetten 1 mlrd teńgeden astam qarjy bólingenimen, olar qajetti jabdyqtarmen qamtylmaǵan. Qolda bar órt sóndirý tehnıkasy men kólikterdiń edáýir bóligi tozyp, eskirgen. Kadr tapshylyǵy da basty máselelerdiń biri bolyp otyr. Túgel derlik orman sharýashylyǵy mekemelerinde maman jetispeýshiligi baıqalady», - dep habarlady ShQO mamandandyrylǵan tabıǵat qorǵaý prokýratýrasy.

Ormandarda zańsyz aǵash kesýshiler de anyqtalyp jatyr. 2021-2023 jyldar aralyǵynda osyndaı 101 fakti tirkelip, 10 qylmystyq is qozǵalǵan.

«Orman alqaptarynda aǵashtardyń óspeýine ormandy molyqtyrý sharalarynyń durys júrgizilmeýi áser etip jatyr. Atap aıtqanda, Shyǵys Qazaqstan oblysynyń tabıǵı resýrstar jáne tabıǵat paıdalanýdy retteý basqarmasynyń málimetinshe, orman daqyldarynyń ómir súrý deńgeıi 58%, standarty keminde 70%», - delingen aqparatta.