ShQO-da tórt kúnnen beri izdeýde júrgen jasóspirim tabyldy
ASTANA. KAZINFORM — Shyǵys Qazaqstanda polıtseıler joǵalǵan jasóspirimdi izdep tapty. Tintý jumystaryna 500-den asa polıtseı tartyldy, dep habarlaıdy ІІM baspasóz qyzmeti.
— 15 jastaǵy Aleksandr Koverzın 9 maýsymnan beri iz-túzsiz joǵalǵandardyń qatarynda bolǵan. Qýanyshqa oraı, ol aman-esen tabylyp, qazirgi ýaqytta týystaryna tapsyryldy. Jasóspirimniń ómiri men densaýlyǵyna eshqandaı qaýip joq, — delingen vedomstvo habarlamasynda.
Jasóspirim — kórshiles memlekettiń azamaty. Onyń joǵalǵany týraly habar túsken boıda, Shyǵys Qazaqstan oblysynyń polıtseıleri jedel túrde aýqymdy izdestirý sharalaryn uıymdastyrdy. Qala men onyń aınalasyn, sý qoımalarynyń jaǵalaýyn, qańyrap bos qalǵan jáne ıesiz ǵımarattardy, orman alqaptaryn tintý jumystaryna 500-den astam polıtsııa qyzmetkeri táýlik boıy jumyldyryldy.
Іzdeý jumystaryna tártip saqshylarymen qatar, qutqarýshylar, áskerı qyzmetshiler, qyzmettik ıtteri bar kınologtar men drondar tartyldy. Іs barysynda azamattardyń belsendiligi de mańyzdy ról atqardy: jergilikti turǵyndardyń biri áleýmettik jelilerdegi baǵdar arqyly uqsas jasóspirimdi kórgenin aıtyp, shamamen júrgen ornyn kórsetken.
Іzdeý jumystarynyń úshinshi kúni jasóspirimdi polıtsııa qyzmetkerleri Aleksandr Isaev Ermek pen Qýanysh Akemeev qańyrap qalǵan ǵımarattardyń birinen tabyldy.
— Jasóspirimniń aıtýynsha, ol úıinen ádeıi shyǵyp ketken jáne biraz ýaqyt jalǵyz bolǵysy kelgen. Osy ýaqyt ishinde ol jalǵyz ózi ıesiz ǵımaratta bolǵan. Qýanyshka oraı, onyń densaýlyǵyna zııan kelgen joq. Ol anasyna tapsyryldy. Jasóspirimmen jáne onyń zańdy ókilderimen osyndaı jaǵdaılarǵa jol bermeý maqsatynda profılaktıkalyq áńgime júrgizildi, — delingen habarlamada.
Polıtsııa ata-analar men qamqorshylardy jasóspirimderdiń emotsıonaldyq jaǵdaıyna kóbirek nazar aýdarýǵa jáne olarmen senimdi qarym-qatynasta bolýǵa shaqyrady.
Polıtsııa izdestirý jumystaryna atsalysqan barlyq azamatqa úlken alǵys bildiredi. Qoǵamnyń qoldaýy men barlyq qyzmetterdiń úılesimdi áreketiniń arqasynda qaıǵyly jaǵdaıdyń aldyn alyp, balany otbasyna aman-esen qaıtarý múmkin boldy.
Buǵan deıin Aqmola oblysynda 10 kún buryn joǵalǵan 6 jasar balanyń denesi tabylǵanyn jazǵanbyz.