ShQO-da toǵandy lastaǵan zaýytqa aıyppul salyndy
ÓSKEMEN. QazAqparat – ShQO Ekologııa departamenti «Qazmyrysh» JShS Altaı taý-ken baıytý kombınatynyń toǵanǵa jasyl tústi qaldyq sýdy jiberý faktisi boıynsha tekserý júrgizdi, dep habarlaıdy QazAqparat tilshisi.
Shyǵys Qazaqstan oblystyq Ekologııa departamenti toǵan sýynyń lastanýy boıynsha tekserý jumystaryn 5-20 mamyr aralyǵynda júrgizgen. Sonyń nátıjesinde «Qazmyrysh» JShS Altaı taý-ken baıytý kombınatynyń óreskel buzýshylyqtarǵa jol bergeni anyqtaldy.
«Ekologııalyq saraptamanyń qorytyndysyna sáıkes, toǵanǵa tógilgen sý kórsetilgen shekten asyp ketken. QR Ekologııalyq kodeksiniń 225-baby 4-tarmaǵyna sáıkes jer ústi sý qoımalaryna aǵyzylatyn sarqyndy sý móldir, boıaýsyz, ıissiz bolýy qajet, sondaı-aq quramynda aýrý týdyratyn bakterııalar jáne gıgıenalyq normatıvterden asatyn kontsentratsııalarda adam densaýlyǵy men janýarlar úshin zııandy zattar bolmaýy tıis», - delingen departament málimetinde.
Zertteý nátıjesinde, sarqyndy sýda emıssııalar bekitilgen normatıvterden marganets boıynsha – 140 ese, myrysh – 44,8 ese, tuz ammonııi – 2,3 ese, nıtrıt-ıon – 5,1 ese, sýlfattar – 5,7 ese, mys – 5 ese asqany anyqtaldy.
Osyndaı quqyq buzýshylyq jasaǵan «Qaztsınk» JShS-ǵa 291 700 teńge mólsherinde aıyppul salyndy.
