ShQO-da Telegram-arnalar arqyly satylmaq bolǵan 1 500-den astam veıp tárkilendi

ÓSKEMEN. KAZINFORM — Shyǵys Qazaqstan oblysynda veıp satýmen aınalysqandardyń joly kesildi. Bul týraly ShQO boıynsha ekonomıkalyq tergep-tekserý departamenti basshysynyń orynbasary Tımýr Muqanov Óńirlik kommýnıkatsııalar qyzmetinde ótken brıfıng barysynda málim etti.

— Memleket basshysynyń veıp ónimderin satýǵa tyıym salý jónindegi tapsyrmasyn oryndaý maqsatynda júrgizilgen jumystar barysynda Telegram-arnalar arqyly veıp qurylǵylary men suıyqtyqtaryn zańsyz satýdyń 3 faktisi anyqtaldy. Ár arnanyń myńnan astam jazylýshysy bolǵan. Al ónimder Óskemen qalasynyń turǵyndaryna taratylǵan. Tergeý nátıjesinde 1 500-den astam veıp tárkilenip, arna ákimshileri men kýágerlerden jaýap alyndy. Úsh istiń ekeýi sotqa joldandy, — dedi ol.

Sondaı-aq óńirde qarjylyq pıramıdalarǵa qarsy kúres kúsheıtilgen. Bıyl sot sheshimimen LiveGood jáne NeoETF qarjylyq pıramıdalaryn jarnamalaǵan 3 adam ákimshilik jaýapkershilikke tartylyp, olardyń buqaralyq aqparat quraldarynda shyǵý quqyǵy 3 aıǵa shekteldi.

Oblys boıynsha qarjylyq pıramıda, zańsyz onlaın oıyndar jáne krıptovalıýta boıynsha 481, onlaın-kazıno jáne qumar oıyndary boıynsha 591, krıptovalıýta aıyrbastaý qyzmeti boıynsha 121 silteme buǵattalǵan. 

Eske salsaq, osyǵan deıin «Bıpek Avto» kompanııalar tobynan memleketke 11,6 mlrd teńgeniń múlki tárkilengeni habarlanǵan.