ShQO-da tehnıkalyq qyzmet stansasynyń jumysshysy mas kúıde klıenttiń kóligin aıdap ketken

Óskemen qalasynda tehnıkalyq qyzmet kórsetý stansasynda jumys isteıin er adam mas kúıde klıenttiń kóligin aıdap ketti, dep habarlaıdy Kazinform. 

ShQO Polıtsııa departamenti baspasóz qyzmetiniń málimetine súıensek, polıtsııaǵa habarlasqan qala turǵyny TQKS-qa jóndetýge qaldyrǵan «Suzuki» markaly avtokóliginiń urlanǵanyn aıtty.

«Belgili bolǵandaı, kólikti aıdap ketken er adam alysqa qashyp úlgermegen. Kólik beınebaqylaý kamerasyna túsip qaldy. Sonyń arqasynda ony polıtsııa qyzmetkerleri toqtatqan. 29 jastaǵy azamat sol stansada kólik jóndeýshi bolyp jumys istegeni anyqtaldy. Sondaı-aq ol mas kúıde bolǵan», - delingen aqparatta.

Qazirgi ýaqytta er adam qolhatpen bosatyldy. Avtokólikti urlaý faktisi boıynsha QR QK-niń 200-baby 1-bóligimen sotqa deıingi tergeý bastaldy. Júrgizýshige kólikti mas kúıde tizgindegeni úshin QR ÁQBtK-niń 608-babymen ákimshilik hattama toltyryldy.

«Beınebaqylaý kameralary qylmysty izin sýytpaı ashýda jáne quqyq buzýshylyqtyń aldyn alýda kóp kómek kórsetedi. 2023 jyly kameralar arqyly 141 qylmys, onyń ishinde 12 tonaý, 10 buzaqylyq, 51 urlyq jáne 18 kólikti aıdap áketý qylmysy ashylǵan», - delingen habarlamada.