ShQO-da tazalyq jumystaryn júrgizip júrgen jumysshyny júk tıegish basyp ketti
ÓSKEMEN. KAZINFORM — Shyǵys Qazaqstan oblysy Glýbokoe kentinde turmystyq qaldyqtardy sanıtarlyq tazalaý jumystary kezinde 56 jastaǵy er adam qaza boldy. Jumysshyny júk tıegish basyp ketken.
Jumysshy júk tıegishtiń artynda turǵan. Júrgizýshi ony baıqamaı, er adamdy basyp ketken. Alǵan jaraqattarynan ol oqıǵa ornynda kóz jumdy.
Glýbokoe aýdandyq polıtsııa bólimi eńbek qaýipsizdigi qaǵıdalaryn buzý, abaısyzda adam ólimine ákelip soǵý faktileri boıynsha qylmystyq is qozǵady. Qazir qaıǵyly oqıǵanyń barlyq mán-jaıy anyqtalyp jatyr.
— Tergeýshiler jumys protsesiniń qalaı uıymdastyrylǵanyn jáne jumystardy júrgizý kezinde qaýipsizdik talaptarynyń saqtalǵan-saqtalmaǵanyn anyqtaýy tıis. Qazirgi ýaqytta istiń mán-jaıyn tolyq, obektıvti jáne jan-jaqty zertteýge baǵyttalǵan barlyq qajetti tergeý áreketteri júrgizilip jatyr, — dep habarlady Shyǵys Qazaqstan oblysy polıtsııa departamenti.
Qylmystyq-protsestik kodekstiń 201-babynyń talaptaryna sáıkes, ózge aqparat jarııa etilmeıdi.
Eske salsaq, osyǵan deıin ShQO-daǵy ken ornynan shahta sýyn zańsyz tógý faktisi anyqtalǵany habarlanǵan.
