ShQO-da «Taza Qazaqstan» Road-estafetasy aıasynda 25 tonna qoqys jınaldy
ÓSKEMEN. KAZINFORM — «Ádilet» partııasynyń «Jastar Rýhy» jastar qanatynyń bastamasymen qolǵa alynǵan «Taza Qazaqstan» Road-estafetasy Shyǵys Qazaqstan oblysynda máresine jetti.
13-16 qazan aralyǵyna ótken estafeta aıasynda Aqmola, Pavlodar, Abaı jáne Shyǵys Qazaqstan oblystarynda jalpy uzyndyǵy shamamen 1 800 shaqyrym jol boıy tazartylyp, 150 tonna qoqys jınaldy.
Shara sheńberinde 5 negizgi baǵyt boıynsha ekologııalyq, qoǵamdyq jáne sporttyq is-sharalar uıymdastyryldy. Atap aıtqanda, jol boıyndaǵy aýmaqtardy qoqystan tazartý, ekologııalyq aktsııalar men ekoaktıvıtıler ótkizý, aýyl turǵyndarymen jáne jastarmen kezdesýler uıymdastyrý, tarıhı-mádenı oryndardaǵy vandalızmge qarsy kúreske baǵyttalǵan aktsııalar, sondaı-aq «Chempıondyq rýh» jobasy aıasynda sporttyq is-sharalar ótkizildi. Bul bastama Memleket basshysy Qasym-Jomart Toqaev jarııalaǵan «Taza Qazaqstan» jalpyulttyq ekologııalyq aktsııasy aıasynda júzege asyrylyp otyr.
Shyǵys Qazaqstanda 317 shaqyrym aýmaq qamtylyp, 25 tonna qoqys jınaldy. «Jastar Rýhy» Jastar qanatynyń Shyǵys Qazaqstan oblystyq fılıalynyń konsýltanty Elmıra Nurseıitova Road-estafeta ekologııalyq mádenıetti qalyptastyrýmen qatar, jastardyń azamattyq belsendiligin arttyrýǵa múmkindik bergenin atap ótti.
— Biz estafetany kórshiles Abaı oblysynan qabyl aldyq. Shyǵys Qazaqstanda 2 aýdan men 3 aýyl qamtyldy. Jalpy sany myńnan astam jas qatysty. «Taza Qazaqstan» — qatardaǵy tazalyq jumysy emes. Bul tabıǵatty, tarıhı murany jáne elimizdiń bolashaǵyn saqtaýǵa qosqan ortaq úlesimiz. Óıtkeni elimizdiń tazalyǵy árqaısymyzdan bastalady! — dedi ol.
Eske salsaq, osyǵan deıin Almatydan Qyzylordaǵa deıingi road-estafeta bastalǵany habarlanǵan.
