ShQO-da Táýelsizdik kúninde birqatar áleýmettik nysan ashyldy
Shyǵys Qazaqstanda Táýelsizdik kúni qarsańynda 11 áleýmettik mańyzy bar nysan ashylyp, 744 otbasyǵa baspana berildi. Aımaq basshysy Danıal Ahmetov shyǵysqazaqstandyqtardy ulyq merekemen quttyqtady.
«Táýelsizdik jyldarynda Qazaqstan áleýmettik-ekonomıkalyq damýda aıtarlyqtaı jetistikterge qol jetkizdi. Tuńǵysh Prezıdent Nursultan Nazarbaevtyń kóregen saıasatynyń jáne barsha qazaqstandyqtardyń eren eńbeginiń arqasynda elimizde aýqymdy reformalar tabysty júzege asyryldy», - dedi ol.
Mereke kezinde Aıagóz aýdanynda 120 otbasy «Nurly jer» baǵdarlamasy aıasynda salynǵan 60 páterlik eki úıde qonys toıyn toılaýda. Sondaı-aq aýdanda taǵy 20 kópbalaly otbasyǵa jeke úıdiń kilti tabys etildi. Tarbaǵataı aýdanynyń turǵyndary eki páterlik 11 úıge qonystandy. Besqaraǵaı aýdanyndaǵy 10 otbasyǵa eki páterlik 5 úıdiń kilti tabystaldy. Kýrchatov qalasynda jetim jáne ata-anasynyń qamqorlyǵynsyz qalǵan 6 balaǵa páter berildi.
«Budan bólek, Táýelsizdik kúnine oraı Tarbaǵataı aýdany Aqjar aýylynda kúrdeli jóndeýden keıin Abaı atyndaǵy mektep ashyldy. Tarbaǵataı jastar resýrstyq ortalyǵynyń janynan kovorkıng ortalyǵy jumysyn bastady. Katonqaraǵaı aýdanynyń Aqqaınar aýylynda aǵymdaǵy jóndeýden keıin aýyldyq klýb, sondaı-aq Órel aýylynda kitaphana ashyldy», - delingen ShQO Aqparat ortalyǵy taratqan málimette.
Óskemen qalasynda oqýshylar arasynda shaıbaly hokkeıden «Juldyzsha» qalalyq týrnıri ótkizildi. Al «Samal» saıabaǵynda, «Altaı» stadıonynda, Komsomol aralynda jáne etnoparkte konkımen syrǵanaý úshin muz alańdary ashylǵan. Oblystyń barlyq qalalary men aýdandarynda onlaın formatta merekelik kontsertter ótti.
