ShQO-da tasjoldardyń birinde kólik qozǵalysyna ýaqytsha tyıym salyndy

ÓSKEMEN. QazAqparat – Shyǵys Qazaqstan oblysyndaǵy tasjoldardyń birinde kólik qozǵalysy shekteldi, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, velosporttan erler arasynda ótip jatqan respýblıkalyq jarysqa baılanysty óńirdegi tasjoldardyń birinde kólik qozǵalysy shekteldi.

«28 mamyrda oblystyq mańyzy bar «Óskemen-Samar» tasjoly boıynda avtokólikterdiń qozǵalysyna ýaqytsha shekteý engiziledi. Júrgizýshilerdi jolǵa shyǵar aldynda osyny eskerip, baǵytyn aldyn ala belgilep alýyn suraımyz», - delingen aqparatta.

Aıta keteıik, 26 mamyrdan bastap Shyǵys Qazaqstanda velosporttan erler arasynda Qazaqstan Respýblıkasynyń chempıonaty ótip jatyr.

Doda 30 mamyrǵa deıin jalǵasady.