ShQO-da tasjolda aýdarylyp túsken kólik júrgizýshisi kóz jumdy

  Shyǵys Qazaqstan oblysynda tasjolda kólik aýdarylyp, 1 adam kóz jumdy, dep habarlaıdy Kazinform.

Jol-kólik oqıǵasy 12 qarasha kúni saǵat 16.00 shamasynda oblystyq mańyzy bar «Óskemen-Vınnoe aýyly» tasjolynda bolǵan.

«Atalǵan tasjoldyń Glýbokoe aýdanyndaǵy 9-shaqyrymynda kele jatqan «Subaru outback» markaly avtokólik júrgizýshisi rýlge ıe bola almaı qaldy. Sonyń saldarynan kólik aýdarylyp túsip, er adam sol jerde mert boldy», - dep habarlady ShQO Polıtsııa departamentiniń baspasóz qyzmeti.

Atalǵan fakti boıynsha QR Qylmystyq Kodeksiniń 345-baby 3-bóligine (Kólik quraldaryn basqaratyn adamdardyń abaısyzda adam ólimine ákep soqqan jol qozǵalysy erejelerin buzýy) sáıkes sotqa deıingi tergeý amaldary bastaldy.

Qazirgi ýaqytta birqatar sot-medıtsınalyq saraptama taǵaıyndalǵan. Sonyń qorytyndysy boıynsha protsessýaldyq sheshim qabyldanady.