ShQO-da tasqynnan keıin 200-den astam adam úılerine oraldy
ASTANA. QazAqparat - Shyǵys Qazaqstan oblysynyń Aıagóz aýdanynda sý tasqynynan keıin 200-den astam adam úılerine oraldy, dep habarlaıdy QazAqparat ShQO tótenshe jaǵdaılar departamentine silteme jasap.
«Aıagóz aýdanynda komıssııa tekserý barysynda sý tasqynynan zardap shekken taǵy 89 úıdi anyqtady. Qazirgi kezde barlyq úılerdegi jáne aýlalardaǵy sý ketti. Qaýipsiz jerge kóshirilgen adamdardyń bir bóligi mektep-ınternat bazasyndaǵy evakýatsııa beketine ornalastyryldy. Olarǵa ystyq tamaq jetkizilip, psıhologııalyq kómek kórsetilip jatyr. 200-den astam adam úılerine qaıtty», - delingen habarlamada.
TJD ókilderiniń aıtýynsha, jaǵdaıdy táýlik boıy baqylap otyr.
Degenmen Shyǵys Qazaqstanda 7 úı áli de bolsa sý tasqynynan qutylar emes, sonyń beseýi Óskemende bolsa, taǵy eki úı Kúrshimde.
Ulan, Kúrshim, Zaısan jáne Úrjar aýdandarynda avtojoldar sýdan tazara bastady, al «Kúrshim - Maraldy» kúre jolynyń 39 km ýchaskesinde qalpyna keltirý jumystary júrip jatyr.
Kúrshim jáne Topterek aýyldarynda adamdardy ýaqytsha kóshirý jumystary jalǵasýda. Qutqarýshylar atalǵan aýyldarda bir táýlikte 70 adamdy kóshirgen.
Tarbaǵataı jáne Shemonaıha aýdandarynda jaǵdaı turaqty.
«Aldaǵy eki kúnde keıbir aýdandar men ózenderde sýdyń jınalýynyń aldyn alý maqsatynda jarý jumystary júrgiziledi. ShQO TJD basshylyǵy sý tasqyny qaýpin múmkindiginshe anyq boljaý maqsatynda aýdandardy aralap ushyp shyǵyp jatyr», - deıdi vedomstvo qyzmetkerleri.
