ShQO-da tarıhı-ólketaný mýzeıinde selfı kúni ótti
ÓSKEMEN. QazAqparat – Shyǵys Qazaqstan oblysy Rıdder qalasyndaǵy tarıhı-ólketaný mýzeıinde selfı kúni ótti, dep habarlaıdy QazAqparat tilshisi.
Mýzeıdegi selfı kúni fleshmoby halyqaralyq deńgeıde jyl saıyn 15 qańtarda atalyp ótedi. Sharanyń sharty qarapaıym – kelýshiler ózderine unaǵan eksponattarmen sýretke túsip, áleýmettik jelilerge jarııalaýy tıis.
Rıdder tarıhı-ólketaný mýzeıi de aktsııadan shet qalmaı, kelýshilerdiń nazaryna mýzeı qoryndaǵy eń qyzyqty eksponattardy usyndy. Onyń ishinde jaýynger qarý-jaraǵy, Qazaqstanda turatyn etnostardyń ulttyq kıimderi men bas kıimderi bar.
«Osy aktsııany qoldaýǵa sheshim qabyldadyq. Óıtkeni biz de, kelýshiler de bir-birimizdi saǵynyp qaldyq. Shara barlyq sanıtarlyq normalardy saqtaı otyryp ótýde. Áleýmettik jelilerdegi paraqshalarymyzda aldyn ala ańdatpa jasadyq», – deıdi Rıdder tarıhı-ólketaný mýzeıiniń mamany Elena Pýtıntseva.
Áınekterdiń ar jaǵyndaǵy eksponattardy kózben kórip tamashalaǵannan góri, eń alǵashqy telefondy qulaǵyńa tósep, ıyǵyńa naǵyz soldat shınelin kıip kórgen áldeqaıda áserli ekeni sózsiz. Sonymen qatar mýzeıge kelýshiler kıiz úıge jaıylǵan dastarhanǵa jaıǵasyp, janýarlar men ósimdikterdiń tanymal túrleriniń ekspozıtsııasy qoıylǵan tabıǵat zalynda sýretke tústi.
Aıta keteıik, kelýshiler ózimen birge jeti tanysyn ertip kelip, #Rıddermýzeı heshtegi arqyly áleýmettik jelilerde fotosýretin jarııalaǵan jaǵdaıda, mýzeıge tegin kirý abonementine ıe bolady.
