ShQO-da tanysyn óltirgen jigit 7 jylǵa sottaldy
SEMEI. QazAqparat -Shyǵys Qazaqstan oblysynyń qylmystyq ister jónindegi mamandandyrylǵan aýdanaralyq soty óziniń tanysyn óltirgen 18 jastaǵy jigitti 7 jylǵa bas bostandyǵynan aıyrdy, dep habarlaıdy QazAqparat.
Aıyptalýshy Óskemendegi ýnıversıtettiń 2-kýrs stýdenti. Ol Katonqaraǵaı aýdanyna ata-anasyna 4 kún demalysqa kelgen.
Іs materıaldaryna sáıkes, Katonqaraǵaı aýdanynyń bir top jastary aýdan mańynda bas qosyp, aralaryndaǵy biriniń týǵan kúnin atap ótpek bolady. Biraz ýaqyttan soń bul jerge taǵy eki azamat kelip qosylady. Álgi jerge kelgen bette Á.Shýıbekov A.Ermekbaevqa «ishimdik alyp ber» dep talap qoıyp, sebepsiz tıise bastaıdy. Ekeýiniń arasynda tóbeles bolady.
Yzaǵa býlyqqan A.Ermekbaev qarsylasyn qasaqana óltirýge sheshim qabyldaıdy. Osylaısha, ol avtokóliktiń artqy oryndyǵynyń qaltasynda turǵan búktemeli bákini alyp, qarsylasynyń keýde tusyna suǵyp alady. Alǵan dene jaraqattary áserinen jábirlenýshi jedel járdem kelmeı, kóp qan ketýine baılanysty oqıǵa ornynda qaıtys bolǵan.
«Sot sheshimimen aıyptalýshy Qazaqstan Respýblıkasynyń Qylmystyq kodeksiniń 99-babynyń 1-bóligimen qarastyrylǵan qylmys jasaǵany úshin kináli dep tanylyp, oǵan 7 jyl 6 aı bas bostandyǵynan aıyrý jazasy taǵaıyndaldy. Qaıtys bolǵan azamattyń ata-anasyna 613 550 teńge materıaldyq zalal jáne 3 mln teńge moraldyq zııannyń ótemaqysyn tóleý jóninde sheshim shyǵaryldy»,-delingen Shyǵys Qazaqstan oblysynyń qylmystyq ister jónindegi mamandandyrylǵan aýdanaralyq soty bergen aqparatta.
