ShQO-da tanysyn bopsalady degen kúdikpen er adam ustaldy
ASTANA. KAZINFORM – Shyǵys Qazaqstan oblysynyń Shemonaıha qalasynda tanysynan aqsha men múlik talap etti degen kúdikpen jergilikti turǵyn ustaldy.
Aldyn ala málimet boıynsha, 39 jastaǵy er adam 2023 jyldan beri kúsh qoldanamyn dep qorqytyp, jábirlenýshiden aqsha alyp otyrǵan.
«Keltirilgen materıaldyq shyǵyn kólemi shamamen 2,5 mıllıon teńgeni quraǵan», – dep habarlady polıtsııa.
Tergeý derekterine sáıkes, kúdikti jábirlenýshiden ózine tıesili Volkswagen Passat avtokóligin satýdy talap etken. Mámile júzege aspaǵan soń odan 1 mıllıon teńge berýdi talap etken.
Zańsyz áreketter saldarynan jábirlenýshi qomaqty qarajatynan jáne múlkinen aıyrylǵan.
Qazirgi ýaqytta kúdikti qamaýǵa alyndy.
Atalǵan fakti boıynsha sotqa deıingi tergep-tekserý júrgizilip jatyr.
«Polıtsııa azamattardy kez kelgen zańsyz áreket úshin zańda belgilengen jaýapkershilik qarastyrylǵanyn eskertedi», – delingen habarlamada.
Aıta keteıik, Almaty oblysynda sottalǵandardan aqsha bopsalaǵan qylmystyq top músheleri sottaldy.
