ShQO-da taǵy da órt: Qutqarýshylar 2 gektarǵa jaıylǵan dala órtimen kúresýde

ÓSKEMEN. QazAqparat – Shyǵys Qazaqstan oblysy Altaı aýdanynda shyqqan dala órti 2 gektar aýmaqqa jaıylǵan, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, Altaı aýdanyndaǵy demalys bazalarynyń birinde shóp órtengen.

«Tilsiz jaý lezde 2 gektar aýmaqqa tarap ketti. Qazirgi ýaqytta oqıǵa ornyna 12 órt sóndirýshi men 3 avtotsısterna, jergilikti atqarýshy organnan 6 qyzmetker tartylǵan. Zardap shekken eshkim joq. Órt demalys bazasyndaǵy úılerge jetpedi», - dep habarlady vedomstvo ókilderi.

Sondaı-aq qajet bolǵan jaǵdaıda sol jerge qosymsha kúsh jumyldyrylady. Osy sátte Óskemen qalasynan 5 órt sóndirý kóligi men 20 adam shyǵýǵa daıyn tur.