ShQO-da taǵy bir ózen arnasynan tasyp, aýlalardy sý basty
ÓSKEMEN. QazAqparat - Tarbaǵataı aýdanyndaǵy Bazar ózeni tasyp jatyr. Tótenshe jaǵdaı qyzmetkerler tasyǵan sýdy Kóktúbek eldi mekenindegi úılerge jetkizbeý úshin kúresip jatyr, dep habarlaıdy QazAqparat tilshisi.
Qatty erigen qar Tarbaǵataı aýdanyndaǵy Bazar ózenin arnasynan asyrdy. Jergilikti ákimdik pen tótenshe jaǵdaı qyzmetiniń ókilderi ınertti materıaldar men qumqap tósep, sýdyń aldyn tosýda. Atalǵan ózen Omby-Maıqapshaǵaı jolyn bes ret kesip ótedi. Arnadan asqan sý Sátpaev aýyldyq okrýgine qarasty Kóktúbek eldi mekenine jaıylǵan.
«Barlyq kúsh úılerdi qorǵaýǵa baǵyttalýda. Sonyń ózinde 4 aýlaǵa sý kirgen. Oqıǵa ornynda 35 adam, 5 tehnıka jumys istep júr» - dedi oblystyq tótenshe jaǵdaı departamentiniń baspasóz qyzmeti.
Shemonaıha aýdanynda Verh-Ýba aýylynda da tórt úıdiń aýlasyna sý kirgen. Munda da tıisti qyzmet ókilderi turǵyndarǵa kómekke kelgen.
