ShQO-da taǵy bir dala órtimen kúres úshinshi kúnge sozyldy
ÓSKEMEN. QazAqparat – Shyǵys Qazaqstan oblysy Kúrshim aýdanynda 300 gektarǵa jaıylǵan dala órtimen kúres úshinshi kúnge sozyldy, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, 5 qyrkúıek kúni keshki ýaqytta Kúrshim aýdanynda ashyq alańda órt shyqqan.
Qazirgi ýaqytta tilsiz jaý «Marqakól» orman sharýashylyǵyna, «Bobrovka» ormanshylyǵy men Tósqaıyń aýyldyq okrýgi aýmaǵyna jaıyldy.
«300 gektar alańda shóp, buta men aǵash órtenýde. Otpen TJD órt sóndirýshileri, ormanshylar, jergilikti atqarýshy organ ókilderi men polıtsııa qyzmetkerleri tarapynan 270-ten astam adam men 34 tehnıka jumyldyrylǵan. Sondaı-aq «MI-8» jáne «Evrokopter» tikushaqtary iske qosyldy», - delingen aqparatta.
Eń jaqyn ornalasqan Tósqaıyń aýyly men ot oshaǵynyń arasy – 10 shaqyrym.
Eldi mekenge eshqandaı qaýip tónip turǵan joq. Tósqaıyń aýyldyq okrýgi ákimdiginiń qyzmetkerleri órt sóndirýshilerdi ystyq tamaqpen qamtamasyz etip, kómek kórsetip jatyr.
Eske salsaq, osyǵan deıin Shyǵys Qazaqstandaǵy Altaı aýdanynda shyqqan dala órtiniń 700 gektarǵa jaıylǵanyn habarlaǵan edik.
Vıdeodan alynǵan kadr/instagram.com/shygysqaz_tjd
