ShQO-da taǵy ormanǵa barýǵa tyıym salyndy

ÓSKEMEN.KAZINFORM — Shyǵys Qazaqstan oblysynda joǵary órt qaýpi tirkeldi. «Qazgıdromet» RMK ShQO fılıalynyń málimetinshe, 26 tamyzdan bastap oblystyń soltústiginde, ońtústik-shyǵysynda, ortalyǵynda joǵary órt qaýpi tirkelgen. Sondyqtan ázirge ormanǵa barýǵa tyıym salynǵan.

— Aýa raıynyń ystyq ári qurǵaq bolýyna baılanysty orman alqaptarynda órt shyǵý qaýpi joǵary. Osyǵan baılanysty memlekettik orman qory aýmaǵynda adamdardyń júrýine ruqsat etilmegen. Tabıǵat aıasynda jáne úı janyndaǵy jerlerde ot jaǵýǵa bolmaıdy. Eger órtti baıqasańyz, dereý «112» nómirine qońyraý shalyńyz, — dep habarlady oblystyq Tótenshe jaǵdaılar departamentiniń baspasóz qyzmetinen. 

Eske salsaq, shilde aıynda Katonqaraǵaı órt qaýpine baılanysty týrıster úshin ýaqytsha jabylǵany habarlanǵan.