ShQO-da taǵy 3 jolda qystyń sońyna deıin kólik qozǵalysy shekteldi
ÓSKEMEN. KAZINFORM - Shyǵys Qazaqstan oblysyndaǵy birneshe jolda keıbir kólik túrleriniń qozǵalysyna tyıym salyndy.
«OblShyǵysJol» JShS málimetine súıensek, shekteýler búginnen bastap qys mezgiliniń sońyna deıin jalǵasady.
— Óskemen-Tarǵyn-Samar tasjolynyń 63-145 shaqyrymynda, Óskemen-Taýly Úlbi-Soltústik tasjolynyń 18-60 shaqyrymynda jáne Terekti-Urunhaıka-Tósqaıyń tasjolynyń 7-57 shaqyrymynda kez kelgen úlgidegi tirkemeleri nemese jartylaı tirkemeleri bar júk kólikteri men traktorlardyń qozǵalysy úshin shekteýler engiziledi. Sondaı-aq oblystyq mańyzy bar joldarda mehanıkalyq kólik quraldaryn súıretýge tyıym salynady, — delingen aqparatta.
Aıta keteıik, kólik júrgizýshileri joldaǵy shekteýlerge qatysty aqparatty táýlik boıy jumys isteıtin 1403 baılanys ortalyǵyna habarlasyp ala alady.
Eske salsaq, osyǵan deıin ShQO-daǵy tasjoldardyń birinde qystyń sońyna deıin kólik qozǵalysy shektelgeni habarlanǵan.