ShQO-da syıaqy alatyn muǵalimder sany artady
ÓSKEMEN. QazAqparat - Shyǵysqazaqstandyq 11 muǵalim CELTA synaǵynda joǵary nátıje kórsetip, halyqaralyq dárejedegi aǵylshyn tilin oqytýshy atandy. Bul týraly ákimdiktiń kezekti otyrysynda aıtyldy, dep habarlaıdy QazAqparat tilshisi.
Óz pánin joǵary deńgeıde meńgertip júrgen ustazdardy yntalandyrý maqsatynda ótken jyly Óskemen, Semeı, Rıdder qalalary men Zyrıan, Borodýlıha aýdandarynyń 12 muǵalimine 800 myń teńgeden bir rettik syıaqy taǵaıyndalǵan bolatyn. Bıyl syıaqy alýshylardyń sanyn ulǵaıtý kózdelip otyr.
«2017 jyly biliktilik deńgeıi joǵary bolǵan oqytýshylar tıimdi taǵaıyndaý júıesi boıynsha syıaqy aldy. Kórsetken nátıjeler negizinde syıaqyǵa laıyqty muǵalimder qataryn arttyrýdy tapsyramyn» - dedi oblys ákimi Danıal Ahmetov.
Byltyr qazaq, orys jáne aǵylshyn tilderinen sabaq beretin 2430 muǵalim uzaqmerzimdi biliktilikti arttyrý kýrstarynan ótken bolatyn. Al 2016 jyly úzdik nátıje kórsetken 21 aǵylshyn tili muǵaliminiń 11-i CELTA sertıfıkatyna ıe boldy. Atalǵan qujat ShQO muǵalimderine halyqaralyq deńgeıdegi trener bolýǵa múmkindik beredi.
«Halyqaralyq emtıhanda bazalyq jáne qarapaıym deńgeı kórsetken 400 muǵalim 144 saǵattyq kýrstan ótedi. Olardy halyqaralyq CELTA sertıfıkatyn alǵan 11 muǵalim men ádistemesin joǵary deńgeıde meńgergen 16 ustaz oqytylatyn bolady. Oqytý úrdisi kóshpeli negizde tegin ótedi» - dedi oblys ákiminiń orynbasary Ásem Núsipova.
Al sońǵy 2 jyl boıy tómen kórsetkish kórsetip kele jatqan muǵalimderge eńbek kelisimshartyn buzý sharasy qoldanylmaq. Jalpy, Shyǵys Qazaqstan 2019 jylǵa deıin úshtildi oqytýdy engizý boıynsha pılottyq óńir esebinde tur.
