ShQO-da sybaılas jemqorlyqqa qatysty 35 is qozǵalǵan

ÓSKEMEN. QazAqparat - Óńirlik kommýnıkatsııalar qyzmetinde Sybaılas jemqorlyqqa qarsy is-qımyl agenttigi ShQO boıynsha departamenti basshysynyń orynbasary Ádilhan Sabýrovtyń qatysýymen press-konferentsııa ótti. Bul jóninde ShQO aqparat ortalyǵyna silteme jasap QazAqparat habarlaıdy.

Ádilhan Sabýrovtyń aıtýynsha, jemqorlyq - Qazaqstandaǵy eń ózekti máselelerdiń biri. QR Sybaılas jemqorlyqqa qarsy is-qımyl agenttigi jemqorlyqtyń aldyn alý, áshkereleý, osy salaǵa qatysty qylmystyq isterdi tergeý amaldaryn júrgizedi.

2018-2019 jyldary departament mamandary 35 qylmystyq isti ashty. Onyń 28-i sotta qaraldy. Al qalǵan jeteýin jasaǵan aıyptylar qylmysyn ózderi moıyndady.

Brıfıng barysynda Ádilhan Sabýrov «Daryn» ǴZM dırektory A.K.Ǵafýrovqa qatysty qylmystyq isti mysal retinde atap ótti. Aıtýynsha, A.K.Ǵafýrov 5 jylǵa bas bostandyǵynan aıyrylyp, memlekettik qyzmetten shettetilgen.

«Mundaı qylmystardyń deni memlekettik qyzmetti kezek kútpeı alǵysy kelgendikten týyndaıdy. Biz qoǵam bolyp jemqorlyqpen kúresýimiz kerek», - dedi Ádilhan Sabýrov.