ShQO-da sybaılas jemqorlyqqa qarsy kúrestiń jańa ádisteri túsindirildi
Keńeste «QR Sybaılas jemqorlyqqa qarsy saıasatynyń tujyrymdamasy» jáne «Sybaılas jemqorlyqtyń aldyn alý jáne oǵan qarsy is-qımyl» (TBN-4) jobasyn iske asyrý máseleleri qaraldy..
2022-2026 jyldarǵa arnalǵan sybaılas jemqorlyqqa qarsy saıasat tujyrymdamasynda Qazaqstan sybaılas jemqorlyqqa qarsy bir saryndy is-qımyldan qoǵamdyq sanany túbegeıli ózgertýge, halyqtyń sybaılas jemqorlyq pen nepotızmniń kez kelgen nysandaryn qabyldamaýyna, aldyn alý sharalarynyń basymdyǵyna kóshetindigi kórsetilgen.
Sybaılas jemqorlyqqa qarsy mádenıetti arttyrý, tárbıeleý jáne bilim berý sharalaryn júıeleý, memlekettik apparat pen bıznes-qoǵamdastyq ókilderin parasatty minez-qulyqqa yntalandyrý arqyly sybaılas jemqorlyqty múldem qabyldamaýǵa qol jetkiziletin bolady.
«Tujyrymdamada turmystyq sybaılas jemqorlyqqa erekshe nazar aýdarylǵan. Sebebi paraqorlyqtyń úlken úlesi turmystyq sybaılas jemqorlyqpen baılanysty. Ókinishke oraı, qoǵamda qandaı da bir artyqshylyqtar alý nemese qandaı da bir máseleni sheshý úshin para berý ońaıyraq degen pikir bar», - dep atap ótti óz sózinde Erlan Jalmaǵambet.
Sondaı-aq, tujyrymdamaǵa sáıkes memlekettik apparat arasynda sybaılas jemqorlyqtyń aldyn alý boıynsha jańa quraldar engizilýde. Atap aıtqanda, josyqsyz qyzmetshilerdi ýaqtyly anyqtaýǵa jáne jumystan bosatýǵa, olardyń yqtımal sybaılas jemqorlyq áreketterinen memleket pen qoǵamǵa zııan keltirýine jol bermeý maqsatynda parasattylyqqa tekseriledi (integrity check).
Memlekettik qyzmetshiler arasyndaǵy sybaılas jemqorlyqqa qarsy is-qımyldyń kelesi sharasy – «aqshany qadaǵalaý (follow the money)» qaǵıdatyn iske asyrý, aktıvterdi izdeý jáne qaıtarý, qylmystyq jolmen alynǵan múlikti tárkileý.
Jalpy alǵanda, sybaılas jemqorlyqqa qarsy saıasat sybaılas jemqorlyqty ekonomıkalyq jáne bedel jaǵynan tıimsiz etýge baǵyttalǵan.
Sybaılas jemqorlyqqa qarsy kúres jáne onyń aldyn alýdyń qazirgi zamanǵy ádisterin qoldaný, onyń ishinde korporatıvtik sektor úshin de ózekti mindet bolyp tabylady.
Osyǵan baılanysty, «Sybaılas jemqorlyqqa qarsy is-qımyl týraly» zańǵa kvazımemlekettik jáne jeke sektor uıymdarynda korporatıvtik standarttardy saqtaýǵa jaýapty sybaılas jemqorlyqqa qarsy komplaens-qyzmetter ınstıtýtyn iske asyrý boıynsha ózgerister engizildi.
Búgingi tańda oblysta 389 kvazımemlekettik sektor sýbektisinde komplaens-qyzmet quryldy.
«Bul sharalardyń barlyǵy adaldyq pen parasattylyqty yntalandyrýǵa, qoǵamda sybaılas jemqorlyqqa qarsy mádenıetti qalyptastyrýǵa baǵyttalǵan» - dep túıindedi sybaılas jemqorlyqqa qarsy vedomstvo basshysy.