ShQO-da suıytylǵan gazdy bólý tártibi buzylǵan: departament shara qabyldady

ÓSKEMEN. KAZINFORM – Qazaqstan Respýblıkasy Básekelestikti qorǵaý jáne damytý agenttiginiń Shyǵys Qazaqstan oblysy boıynsha departamenti «Shyǵys Qazaqstan oblysynyń energetıka jáne turǵyn úı-kommýnaldyq sharýashylyq basqarmasy» MM áreketterinde básekelestikke qarsy is-áreketterdi anyqtady. Bul týraly agenttiktiń baspasóz qyzmeti málim etti. 

— Tekserý barysynda Basqarma suıytylǵan munaı gazyn bólý kólemderin aıqyndaý tetiginiń talaptaryn saqtamaǵany anyqtaldy. Osylaısha, Basqarma áreketterinde Qazaqstan Respýblıkasynyń básekelestikti qorǵaý salasyndaǵy zańnamasyn buzý belgileri, atap aıtqanda Qazaqstan Respýblıkasynyń Kásipkerlik kodeksiniń 194-baby 2-tarmaǵynyń 9) tarmaqshasynda kózdelgen buzýshylyq belgileri baıqaldy, — delingen habarlamada.

Departament Basqarmaǵa básekelestikti qorǵaý salasyndaǵy zańnamany buzýshylyqty joıý qajettigi týraly habarlama joldady.

Buǵan deıin Semeı áýejaıy avıaotyn baǵasyn negizsiz kótergeni úshin jaýapqa tartylǵan edi. 

Sol sekildi Túrkistan áýejaıyna 14,3 mıllıon teńge aıyppul salyndy.