ShQO-da sý tasqyny qaýpi bar aýdandarǵa tikushaqpen barlaý júrgizildi
ÓSKEMEN. KAZINFORM — Shyǵys Qazaqstan oblysynda sý tasqyny qaýpi bar aýdandarǵa áýeden barlaý jasaldy.
Óńirdegi qar kóshkini qaýpi joǵary ýchaskelerdi jáne gıdrologııalyq jaǵdaıdy zertteý maqsatynda áýeden aerovızýaldy monıtorıng jasaýǵa QR TJM «Qazavıaqutqarý» AQ tikushaǵy tartyldy.
— Tikushaqta oblystyq Tótenshe jaǵdaılar departamentiniń, «Qazseldenqorǵaý» ShQ fılıalynyń, Sý resýrstaryn qorǵaý jáne paıdalanýdy retteý jónindegi Ertis basseındik sý ınspektsııasynyń, «Qazgıdromet» RMK-nyń mamandary boldy. Barlaý «Óskemen-Altaı aýdany-Úlken Naryn aýdany-Katonqaraǵaı aýdany-Óskemen» baǵyty arqyly júrgizildi, — dep habarlady oblystyq TJD baspasóz qyzmetinen.
Zerttelgen aýmaqty tolyǵymen qar jaýyp tur. Qar jamylǵysynyń qurylymy turaqty, jotalar men betkeılerde qardy shamaly jel úrlep turǵany baıqalady.
Taýly jerlerde qar kóshkini júrgen joq. Buqtyrma ózenin muz japqan. Azdap sheti erigeni jáne ortasynda oıyqtar baıqalady.
Jalpy oblystaǵy gıdrologııalyq jaǵdaı turaqty.
Eske salsaq, osyǵan deıin Shyǵys Qazaqstanda qar kóshkini túsirilgeni habarlanǵan.