ShQO-da súńgýirler arnaıy daıyndyqtan ótti
Esterińizge sala ketsek, osyǵan deıine óńirdegi sý basý qaýpi tóngen aımaqtarǵa arnaıy tehnıkalar men áskerıler jetkizilgenin habarlaǵan bolatynbyz.
ShQO tótenshe jaǵdaılar departamenti baspasóz qyzmetiniń málimetine súıensek, Óskemendegi jedel qutqarý jasaǵy bazasynda daıyndyq jumystary bastalǵan.
Kómekke kelgen qutqarýshylar toby alpınızm men sýasty daıyndyǵyn júrgizýde. Alǵash qabyldanǵandar áýelde teorııalyq kezeńnen ótti.
Onda olar jabdyqtar, jaraqtar jaıly, qaýipsizdik tehnıkasy men alǵashqy medıtsınalyq kómek kórsetý tásilderimen tanysty.
Osy salada 20 jyldan astam jumys istep kele jatqan oblystyq TJD jedel qutqarý jasaǵy bastyǵynyń orynbasary Evgenıı Egorov alpınıstik baǵyt qutqarýshylar úshin eń mańyzdy dep esepteıdi.
Daıyndyq baǵdarlamasy barysynda arqandy baılaý tásilderi, bıikten túsý tehnıkasy men bekitilgen arqanmen shyǵý ádisteri úıretildi.
«Shyǵys Qazaqstanda 2000-nan astam sý aıdyny bar. Jyl saıyn shaǵyn jáne iri ózenderde, kólderde jazataıym oqıǵalar bolyp jatady. Sondaı jaǵdaılarda jedel áreket etý úshin qutqarýshy-súńgýirler qajet. Daıyndyq kezinde qutqarýshylar tereńge súńgý, sýastynda baǵdar jasaý, qutqarý jumystary oryndaryn tekserý daǵdylaryn jetildirdi. Sondaı-aq sýǵa batyp ketkenderdi izdeýdi de úırendi» delingen habarlamada.
