ShQO-da sýǵa batqan 6 bala qutqaryldy

ÓSKEMEN. QazAqparat – Shyǵys Qazaqstan oblysynda shomylý maýsymy bastalǵaly beri sýǵa batyp bara jatqan 20-dan astam adam, onyń ishinde 6 bala qutqaryldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, oqıǵalardyń kóbisi jabdyqtalmaǵan sý aıdyndarynda bolǵan.

«Bıylǵy shomylý maýsymy bastalǵaly beri sýǵa batyp bara jatqan 20-dan astam adam, onyń ishinde 6 bala qutqaryldy. Ókinishke qaraı, qaza bolǵandar da az emes. Olar mas kúıinde shomylǵandar jáne sýdaǵy qaýipsizdik erejelerin saqtamaǵandar», - dedi TJD bastyǵynyń orynbasary Dmıtrıı Tıtov.

Maýsym aıynan bastap qaýipsizdik maqsatynda qutqarýshylar, polıtsııa qyzmetkerleri jáne eriktilerdiń qatysýymen 15 205 adam oqytylyp, 5000-nan astam reıd júrgizildi. Departament mamandary balalarǵa 124 ınteraktıvti sabaq uıymdastyrdy.

Aıta keteıik, Shyǵys Qazaqstan oblysy ákiminiń qaýlysymen óńirde demalys, sport jáne týrızm úshin 16 oryn belgilengen. Aımaq boıynsha shomylýǵa tyıym salynǵan 64 ýchaske bar.