ShQO-da sýbsıdııa alǵan sharýa qojalyqtar mal basyn saqtaý talaptaryn oryndamaǵan

ÓSKEMEN. KAZINFORM — Shyǵys Qazaqstan oblysynda birqatar fermer memlekettik qoldaý sharttaryn buzǵany úshin alǵan sýbsıdııalaryn bıýdjetke qaıtarýǵa mindettelmek.

Tekserý barysynda bıýdjet qarajaty esebinen satyp alynǵan maldyń saqtalmaǵany belgili boldy. Atap aıtqanda, keıbir jaǵdaılarda malǵa tıisti kútim jasalmaǵan, al jekelegen derekterde belgilengen merzim aıaqtalmaı turyp-aq maldyń etke ótkizilgeni anyqtalǵan.
Bul týraly Shyǵys Qazaqstan oblysy ákimdiginde ótken agroónerkásiptik keshendi damytýǵa arnalǵan jıynda aıtyldy.

Keńes barysynda óńirde 17 ınvestıtsııalyq jobadan turatyn pýl qalyptastyrylǵany habarlandy. Olardyń qatarynda jeti taýarly-sút fermasy men on bordaqylaý alańy bar.

— Aýyl sharýashylyǵy taýar óndirýshileriniń mindettemelerdi saqtaýyna erekshe nazar aýdarylǵan. Sýbsıdııa esebinen satyp alynǵan mal basy keminde eki jyl boıy saqtalyp, qatań túrde maqsatqa sáıkes paıdalanylýy tıis. Mal basyna baqylaý qatań ári júıeli bolýy qajet, — dep habarlady oblys ákimdiginen.

Talaptardy túsindirý maqsatynda aýyl sharýashylyǵy basqarmasynyń mamandary oblystyń barlyq aýdandaryn aralap shyqty. Jergilikti jerde fermerlerge sýbsıdııalaý sharttaryn buzǵany úshin jaýapkershilik bar ekeni eskertilip, maldyń negizsiz joǵalý faktileri rastalǵan jaǵdaıda, bólingen qarajat bıýdjetke qaıtarylatyny habarlandy.

Eske salsaq, osyǵan deıin Atyraýda qoǵamdyq kólikterdi sýbsıdııalaýǵa shamamen 11 mlrd teńge kerektigi habarlanǵan.