ShQO-da sý tasqynynyń aldyn alý úshin qandaı sharalar jasalýda

ÓSKEMEN. QazAqparat – Shyǵys Qazaqstan oblysynda turǵyn úılerdi sý basý faktileri tirkelgen joq, dep habarlaıdy QazAqparat tilshisi.

Búgin oblystyq Aqparat ortalyǵynda ótken baspasóz máslıhaty barysynda ShQO TJD tótenshe jaǵdaılardy joıý basqarmasynyń bastyǵy Alekseı Shtykel óńirde sý tasqynynyń aldyn alý úshin qandaı sharalar atqarylyp jatqanyn tilge tıek etti.

Qazirgi ýaqytta aımaqta qar erip jatyr. Qar jamylǵysynyń bıiktigi 1 sm-den (Óskemen, Aıagóz qalalary) 137 sm-ge deıin (Kúrshim aýdany Marqakól qoryǵy) jetedi.

Jalpy gıdrologııalyq jaǵdaı turaqty. Ózender men sý aıdyndarynda muzdyń ashylýy baıqalady.

Ótken aıda Ertis, Úbe, Buqtyrma, Kúrshim ózenderiniń ýchaskelerinde 15 ret muz jarý jumystary júrgizildi.

Nátıjesinde jalpy aýdany 160 myń sharshy metrden astam muz usaqtaldy.

Sý tasqyny jaǵdaıyna monıtorıng júrgizý maqsatynda 2 ret aerovızýaldy baqylaý júrgizilgen.

Kóshelerde, úı mańyndaǵy aýmaqtarda qarǵyn sýdy sorý úshin jergilikti atqarýshy organdardyń kommýnaldyq qyzmetteri men TJD mamandary birlesip jumys isteýde.

«Oblys boıynsha 31824 tekshe metr sý soryldy. Bul úshin 121 tehnıka, 96 motopompa jáne jeke quramnan 422 adam jumyldyrylǵan. Búgingi tańda oblysta turǵyn úılerdi sý basý faktileri tirkelgen joq. Qar jınalýyna jáne muz jaǵdaıyna monıtorıng jalǵasyp jatyr», - dedi Alekseı Shtykel.