ShQO-da sý tasqynynyń aldyn alý úshin qandaı sharalar atqarylyp jatyr
ShQO Tótenshe jaǵdaılar departamenti baspasóz qyzmetiniń málimetine súıensek, óńir boıynsha sý tasqynynyń aldyn alý jumystary barynsha kúsheıtilgen. «Kóktem-2023» respýblıkalyq komandalyq-shtabtyq oqý-jattyǵýlary sheńberinde qutqarýshylar men tehnıkalardyń sý tasqynyna daıyndyǵy pysyqtaldy.
«Oqý-jattyǵý mazmunyna sáıkes, Shemonaıha aýdanynda qar kúrt erip, Úbe ózeninde sý kóbeıip, kólik kópiriniń tómengi jaǵynda muz kepteldi. Sonyń saldarynan sý deńgeıi kóterilip ketti. Kepteliske baılanysty ózenge irgeles kóshelerdegi úıler sý astynda qaldy. Birinshi bolyp oqıǵa ornyna ákimdik pen TJ bóliminiń qyzmetkerleri keldi. Jaǵdaıdy baǵalap, sý basý aımaǵyn anyqtaǵan soń muz jarý júrgizý týraly sheshim qabyldandy», - delingen aqparatta.
Osy ýaqytta qutqarýshylar turǵyndardy qaýipsiz jerge kóshirdi. Apattar medıtsınasy ortalyǵynyń brıgadasy zardap shekken azamattarǵa alǵashqy medıtsınalyq jáne psıhologııalyq kómek kórsetti. Úılerdi tonaý jaǵdaılaryn boldyrmas úshin qyzmetkerler qorshaýdy jáne patrýldeýdi uıymdastyrdy. Órt sóndirý bólimi men «Shemonaıha sý arnasy» JShS qyzmetkerleri erigen qar sýyn soryp aldy.
«Sondaı-aq jattyǵý barysynda jalpy oblys boıynsha 19,8 myń tekshe metr qar shyǵarylyp, 8 shaqyrym kanal men aryq tereńdetildi. 11 sý ótkizý qurylysy men 7 avtokólik kópiri qardan tazartyldy. Óskemendegi Mahovka ózeninde 400 metr jaǵalaýdy nyǵaıtý jumystary júrgizildi. Budan bólek, Shemonaıha qalasy men Ýst-Talovka kentindegi Úbe ózeninde 10600 sharshy metr aýmaqta muz usaqtaldy», - delingen habarlamada.