ShQO-da sý tasqynynyń aldyn alý úshin qandaı sharalar atqarylýda

ÓSKEMEN. QazAqparat – Shyǵys Qazaqstan oblysynda sý tasqyny kezeńine daıyndalý boıynsha arnaıy qurylǵan jumys toptary iske kiristi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, oblys ákiminiń ókimimen sý tasqyny kezeńine daıyndyq aıasynda arnaıy jumys toptary qurylǵan. Olardyń quramyna jergilikti atqarýshy organ ókilderi, qutqarýshylar, Ertis basseındik ınspektsııasy jáne basqa da organdardyń mamandary kirdi.

«Búginde olar Borodýlıha, Abaı, Katonqaraǵaı aýdandaryna baryp, qar shyǵarý jáne sý ótkizý qubyrlary men kanaldardy tazalaý boıynsha atqarylǵan jumystardy tekserdi. Sondaı-aq qajetti materıaldyq-tehnıkalyq quraldardyń daıyndalýy, halyqpen túsindirý jumystarynyń júrgizilýi, ózenderde josparlanǵan jarylys jumystarynyń oryndaryn baqylady», - delingen aqparatta.

Jumys tobynyń músheleri kásipkerlermen azyq-túlik ónimderi jáne dári-dármekterdi jetkizýge, evakýatsııalanǵan turǵyndardy ornalastyrýǵa kelissóz júrgizdi. Ákimdikte jáne aýyldyq okrýgterde jaýapty laýazymdy tulǵalardyń táýlik boıy kezekshilik etý kestesi bekitildi. Sý tasqyny bolǵan jaǵdaıda halyqty habardar etý shemasy anyqtaldy.

Jalpy, oblys boıynsha kanaldar men aryqtardy, sý ótkizý nysandary men kópirlerdi tazartý jumystary júrgizilip jatyr. 222 myń tekshe metr qar shyǵarylyp, 85 myń ydys-qaptar, 6 myń tonna ınertti materıaldar daıyndaldy.