ShQO-da sý tasqynynyń aldyn alý úshin arnaıy komıssııa quryldy
ÓSKEMEN. QazAqparat – Shyǵys Qazaqstan oblysynda kóktemgi sý tasqynynyń aldyn alý úshin arnaıy qurylǵan komıssııa jumysyn bastady, dep habarlaıdy QazAqparat tilshisi.
Tórt toptan turatyn komıssııaǵa ShQO tótenshe jaǵdaılar departamentiniń qutqarýshylary men jergilikti atqarýshy organ ókilderi kiredi.
Búginde sý basý qaýpi bar barlyq ýchaskeler jiti tekserilýde.
«Sý tasqynyna qarsy sharalar josparyn» jáne «Sý tasqyny qaýpiniń aldyn alý boıynsha sharalar kesheni» jol kartasyn júzege asyrýǵa sáıkes kózdelgen barlyq mindetter egjeı-tegjeıli oryndalady. Oblys aýdandarynda sý tasqynyn boldyrmas úshin jaǵalaýdy bekitý jáne bógetterdiń túbin tereńdetý syndy jumystar atqarylýda. Sonymen qatar komıssııa tasqyn kezinde azamattardy ýaqytsha ornalastyrý oryndarynyń daıyndyǵyn, ınertti materıaldar qory men tehnıkanyń jaǵdaıyn da qadaǵalaıdy» delingen habarlamada.
«Kazgıdromet» RMK fılıalynyń aqparaty boıynsha Shyǵys Qazaqstandaǵy qar jamylǵysynyń bıiktigi 7-den 56 sm-ge deıin jetedi.
Óńirdegi sınoptıkterdiń boljamyna sáıkes, ózenderdiń tasýy ádette naýryzdyń ekinshi onkúndiginen bastap maýsymǵa deıin jalǵasýy múmkin.
«Sý deńgeıiniń kóterilý qarqyny jáne qardyń erýi – aýa temperatýrasynyń kúrt jylýyna nemese jaýynnyń jıi jaýýyna tikeleı baılanysty. Aldaǵy ýaqytta ShQO ákimdiginde tótenshe jaǵdaılar komıssııasynyń otyrysy ótkizilmek. Onda tasqynǵa qarsy turý boıynsha barlyq negizgi máseleler qarastyrylady» delingen vedomstvo málimetinde.
